Wysneus was onlangs uit sy nate om te sien dat die munisipaliteit weer mooi nuwe strepe op die paaie in Fochville se sentrale sakegebied begin verf het. Die ou tekens was al plek-plek so verblyk dat dit ou Wysneus soms skeel oor sy neus laat kyk om te sien waar hy nou eintlik moes ry.

Wysneus was skoon ingenome met die nuwe strepe tot iemand hom daarop gewys het dat van die strepe geverf is oor plekke in die pad wat begin stukkend gaan en binnekort reggemaak sal moet word. Indien dié gate reggemaak word, sal dit beteken dat die nuutgeverfde strepe ook daarmee heen is.

Hoe moeilik kan dit wees om eers die pad reg te maak en dán die strepe te verf? Die munisipaliteit sê gereeld dat hulle nie met huidige belastinggeld meer kan doen as wat reeds die geval is nie.

Hoekom kan hulle dan nie seker maak dat die geld wat wel daar is, reg bestee word nie?

Wysneus het hom nou die dag boeglam geskik toe iemand amper by die drierigting-stop op die hoek van Blyvoor- en Oranjestraat bo-oor my jaag. "Toemaar, dis nog niks nie", sê ‘n inwoner wat langs die kruising woon.

Wysneus het toe vir ‘n paar minute saam met dié man gestaan en gekyk wat bestuurders by die kruising doen.

Tot Wysneus se verbasing het omtrent net een uit elke vyf voertuie vaagweg ‘n poging aangewend om te stop.

Dit skep ‘n gevaarlike situasie want hoewel mense wat aan die onderkant van Oranjestraat na die kruising ry dié kan sien wat van Blyvoorstraat af kom, kan hulle nie diegene sien wat om die draai uit die rigting van Coronationstraat na die kruising aangery kom nie.

Kom nou, is dit dan só moeilik om die verkeersreëls te gehoorsaam, of sal mense dit eers doen wanneer hulle ná ‘n ongeluk in die hospitaal lê?